दक्षिण कोरियाको दक्षिण-पश्चिमस्थित मुआन अन्तर्राष्ट्रिय विमानस्थलमा १८१ यात्रु बोकेको एउटा विमान दुर्घटनाग्रस्त हुँदा कम्तीमा २८ जनाको मृत्यु भएको छ। यो दुर्घटना दक्षिण कोरियाको योनहाप समाचार एजेन्सीले पुष्टि गरेको छ।
बिबिसीका अनुसार बैंकक, थाइल्यान्डबाट फर्किंदै गरेको जेजु एयरको उक्त विमान अवतरणको क्रममा रनवेबाट चिप्लिएर पर्खालमा ठोक्किँदा यो दुर्घटना भएको हो। विमानमा १७५ यात्रु र ६ जना फ्लाइट अटेन्डेन्ट सवार थिए।
स्थानीय अधिकारीहरूका अनुसार दुई जनालाई जीवितै उद्धार गरिएको छ भने विमानको पुछार भागमा रहेका अन्य यात्रुहरूको उद्धार प्रयास जारी छ। दक्षिण कोरियाको अग्नि नियन्त्रक विभागले दुर्घटनास्थलमा ३२ दमकल गाडी परिचालन गरेको जनाएको छ।
दुर्घटनामा परेका १७३ जना यात्रु दक्षिण कोरियाका नागरिक थिए भने दुई जना थाइल्याण्डका नागरिक थिए। हालसम्म दुर्घटनाको कारण स्पष्ट नभए पनि स्थानीय सञ्चारमाध्यमहरूले पंक्षी विमानको प्रणालीमा अड्किँदा यो घटना भएको हुनसक्ने अनुमान गरेका छन्।
दुर्घटनापछि सामाजिक सञ्जालमा सार्वजनिक भएका असत्यापित फुटेजहरूमा विमान रनवेबाट चिप्लिएर ठोक्किँदै आगो लागेको र त्यसपछि कालो धुँवा उडिरहेको देखिएको छ।
दक्षिण कोरियाको फायर एजेन्सीका अनुसार एक यात्रु र एक फ्लाइट अटेन्डेन्टलाई सकुशल उद्धार गरिएको छ।
यो घटनाको थप विवरण आउन बाँकी छ र उद्धार कार्य तीव्र गतिमा भइरहेको छ।